இதனை யோகா உடற் பயிற்சி முறை மூலம் சமநிலைப்படுத்தலாம் என களனி பல்கலைக்கழகத்தின் வெகுசனத் தொடர்புத்துறை பேராசிரியர் கலாநிதி ரோஹன லக் ஷ்மன் பியதாச தெரிவித்தார்.
கண்டி பேராதனை வீதியில் அமைந்துள்ள குடும்ப யோகா கல்வி நிலையம் ஒழுங்கு செய்த ஊடக சந்திப்பின் போதே அவர் இதனை தெரிவித்தார். அவர் மேலும் தெரிவித்ததாவது-,
இன்று எமது நாட்டில் உயர் மட்டத்தில் வாழ்பவர்களது உடல், மன நிலை பாதிக்கப்பட்டாலும் அவர்கள் அதனை நிவர்த்தி செய்துகொள்வதற்கு பல முறைகளை கையாளுகின்றனர். இதற்கான வசதி வாய்ப்பு என்பன அவர்களுக்கு உண்டு. இருப்பினும் மத்திய மற்றும் கீழ் மட்டங்களில் உள்ளவர்களுக்கு அவ்வாறான வாய்ப்புகளும் வசதிகளும் கிடைப்பதில்லை. இதனால் அவர்கள் மத்தியில் மன அழுத்தம் அதிகமாக உள்ளதை காணக் கூடியதாக இருக்கின்றது. இதன் ஒர் விளைவாகவே உலகில் கூடுதலாக தற்கொலை செய்துகொள்ளும் ஐந்து நாடுகளுள் இலங்கையும் உள்ளடங்கியுள்ளது. இவ்வாறான மன அழுத்தங்களை போக்கி மனதையும் உடலையும் சம நிலைப் படுத்தி ஆரோக்கியமான ஒரு நிலைக்கு கொண்டு வருவதற்கு யோகா உடற் பயிற்சி முறை மிக முக்கியத்துவம் பெறுகின்றது.
ஆசியாவில் இருந்து பாரம்பரிய மாக உருவெடுத்த இவ்வகையான உடற்பயிற்சி முறை உலகிற்கு கிடைத்த ஒரு வரப்பிரசாதமாகக் கூட எம்மால் கூறலாம்.
இன்று சமூகத்தில் வாழ்கின்ற எல்லா தரப்பினரும் யோகா முறையை கையாண்டு வருகின்றனர். இதன் மூலம் ஆரோக்கியமான சமூகம் ஒன்றை உருவாக்க முடியும். இன்று இளைஞர்களுக்கு மத்தியில் அதிக பிரச்சினைகளைக் காண்கிறோம். இதற்கு மன அழுத்தம் முக்கிய காரணமாகிறது. மன அழுத்தத்தைப் போக்க தவறான முறைகளை இளைஞர்கள் கையாள்கின்றனர். அவற்றை விட பல மடங்கு யோகா முறை சிறந்தது.
உலக நாடுகளில் அதிக போசனை, அதிகளவு உடல் பருத்தல் என்பன பாரிய சமூகப்பிரச்சினையாகி விட்டது. இலங்கையைப் பொறுத்தவரை 20 சதவீதத்திற்கு மேல் நீரிழிவு நோயாளர்கள் காணப்படுகின்றனர். இதுவும் மேற்சொன்னது போன்று உடற்பருமன், அதிபோஷாக்குணவு, உடற்பயிற்சி இன்மை போன்றவற்றின் அடிப்படையில் உருவான சமூகப்பிரச்சினையாகும். இவற்றிற்கு மேற்கத்தேய நாடுகளில் பாரிய பொருளாதார செலவுக்கு மத்தியில் ஏற்பாடுகள் உள்ளன. உயர் மட்ட மக்களுக்கும் அதற்கான வாய்ப்புக்கள் உண்டு. ஆனால், ஆசிய நாட்டவர்களுக்கு யோகா பயிற்சிகள் அக்குறையை நிவர்த்திக்கக் கூடிய இலகுவான ஒரு வழியாகும்.
யோகாசனப் பயிற்சிகளைப் பொறுத்தவரை மூன்று வசதிகள் உள்ளன. முதலாவதாக வயது வித்தியாசம் இல்லாமல் எவராலும் முடியும். முதியவர், சிறுவர் என்ற பாகுபாடு ஏற்படுவதில்லை. சில விளையாட்டுக்களைப் பொறுத்த வரை வயது பிரிவை அடிப்படையாகக் கொண்டு வேறு பிரிக்க வேண்டும். யோகாசனத்தில் எல்லா வயதுப்பிரிவினரும் குறிப்பிட்ட சில பயிற்சிகளைச் செய்ய முடியும். இரண்டாவதாக இதற்கென பிரத்தியேக இடம் தேவை இல்லை. வீட்டிலும் காட்டிலும் எங்கும் செய்யலாம். ஆனால் விசேட விளையாட்டுக்களுக்கு பிரத்தியேக இடம் தேவை. மூன்றாவதாக சிக்கலில்லாத எளிய முறையைக் கொண்டதாகும். இவ்வாறு சில அனுகூலங்கள் காணப்படுகின்றன.
அதேபோல் ஒருவர் அமர்ந்து கொண்டும் மேற்கொள்ளலாம். படுத்துக் கொண்டும் மேற்கொள்ளலாம். நின்று கொண்டும் மேற் கொள்ளலாம். வயது, உடல் நிலை என்வற்றிற்கு ஏற்ப மேற்கொள்ள முடியும்.
உலகில் எல்லோரும் மகிழ்ச்சியாகவே இருக்க விரும்புகின்றனர். பணம் இருந்தால் மகிழ்ச்சியாக இருக்கலாம் என்பதல்ல. உடல்
உளம் இரண்டும் ஊனமடையாது இருக்கு மாயின் அதுவே மகிழ்ச்சியான வாழ்வாகும்.
யோகாசனப்பயிற்சியில் சிரசாசனம், சர்வாங்காசனம், வஜிராசனம், புஜஆசனம், பத்மாசனம் என்றெல்லாம் பலவகையான ஆசனங்கள் உண்டு. அவற்றுள் குறைந்தது 25 ஆசனங்களாவது நாம் மேற்கொள்வதால் ஒருவகை மனக்கட்டுப்பாடு எமக்குக் கிடைக்கிறது என்றார்.
No comments:
Post a Comment