விருப்பு வாக்கு வீதம் மஹிந்த முதலிடத்தில்!

எட்டாவது பாராளுமன்றுக்கான பொதுத் தேர்தலில் வேட்பாளர்கள் பெற்ற விருப்பு வாக்கு வீத அடிப்படையில், ஐக்கிய மக்கள் சுதந்திர முன்னணியில் போட்டியிட்ட முன்னாள் ஜனாதிபதி மஹிந்த ராஜபக்‌ஷ முதலிடத்தில் உள்ளார்.

மஹிந்த ராஜபக்‌ஷ இம்முறை 423,566 விருப்பு வாக்குகளைப் பெற்றுள்ளார்.

இது அவர் போட்டியிட்ட குருநாகலை மாவட்டத்தில் ஐக்கிய முன்னணிக்கு கிடைத்த 474,124 முழுமொத்த வாக்குகளில் 89% ஆகும்.

ஐக்கிய தேசிய கட்சியின் தலைவர் ரணில் விக்கிரமசிங்க கொழும்பு மாவட்டத்தில் போட்டியிட்டு 500,566 விருப்பு வாக்குகளைப் பெற்றுள்ளார்.

இம்மாவட்டத்தில் ஐ.தே.க.வுக்கு அளிக்கப்பட்ட 640,743 மொத்த வாக்குகளில் இது 78% ஆகும்.

இதேநேரம், ஹம்பந்தோட்டை மாவட்டத்தில் போட்டியிட்ட ஐ.தே.க. பிரதித் தலைவர் சஜித் பிரேமதாச 84% வாக்குகளைப் பெற்றுள்ளார்.

இம்மாவட்டத்தில் ஐ.தே.க.வுக்கு 134,433 வாக்குகளே அளிக்கப்பட்டுள்ள நிலையில், சஜித் 112,645 விருப்பு வாக்குகளைப் பெற்றுள்ளமை குறிப்பிடத்தக்கது.