திருகோணமலைக்கு நேற்று விஜயம் செய்த தூதுவர் சிவில் அமைப்புக்களைச் சந்திக்கும் நிகழ்ச்சி நிரலுக்கு அமைய திருகோணமலை சிவில் அமைப்பு மற்றும் திருகோணமலை மாவட்ட தமிழர் அபிவிருத்தி ஒன்றியம் ஆகிய அமைப்புக்களின் பிரதிநிதிகளை எகேட் நிறுவன மண்டபத்தில் சந்தித்து உரையாடினார்.
இக்கலந்துரையாடலில் திருகோணமலை மறைமாவட்ட ஆயர் நோயல் இம்மானு வேல், எகேட் ஹரிட்டாஸ் பணிப்பாளர் வண. ஜி.நித்திதாஸன், வண.உரிய பிரபாகரன், ஸ்ரீ.ஞானேஸ்வரன், தமிழர் அபிவிருத்தி ஒன்றியத்தின் சார்பில் செயலாளர் பிரகாஸ், அதில் லையம்பலம், ஒ.குவேந்திரன் ஆகியோர் பிரசன்னமாகியிருந்தனர்.
இங்கு பிரித்தானியத் தூதுவர், தமிழ்த் தேசியக் கூட்டமைப்பு வடகிழக்கு இணைப்பைக் கோரிவருகின்றது. அதற்குரிய காரணங்கள் எதுவாக இருக்கும் என்று வினவியபோது சிவில் அமைப்பைப் பிரதிநிதித்துவப்படுத்துவோர் அதற்குரிய காரணங்களை வலியுறுத்திக் கூறினார்.
தூதுவர் தொடர்ந்து கருத்துத்தெரிவிக்கையில், இன்றைய அரசாங்கம் நாளாந்தப் பிரச்சினைகளை தீர்த்து வருகின்றபோதும் நல்லிணக்கமென்பது முக்கியமானது என்பதை கவனத்தில் கொண்டவர்களாக நாம் இருக்கின்றோம். அவதானித்து வருகின்றோம்.
ஒவ்வொரு பிரதேசத்துக்கும் சென்று மக்கள் பிரதிநிதிகள் மற்றும் புத்திஜீவிகள் ஆகியோருடன் கலந்துரையாடி நல்லிணக்க முன்னெடுப்புக்கள் பற்றி அவதானித்து வருகின்றோம்.
ஐ.நா. சபையில் கொண்டுவரப்பட்ட தீர்மானத்தின் அடிப்படையில் இலங்கை அரசாங்கம் ஏற்றுக்கொண்ட இணை உடன்படிக்கையின் பிரகாரம் நல்லிணக்கத்துக்கான செயற்பாடுகள் முன்னெடுத்துச் செல்லப்பட வேண்டுமென்பதில் பிரித்தானிய அரசாங்கம் அவதானிப்பதுடன் கவனம் செலுத்தியும் வருகின்றது.
வடகிழக்கிலுள்ள அதிலும் போருக்குப்பிந்திய நிலைமைகளை நாம் நன்கு அறிந்து கொண்டுள்ளோம். மக்களின் பல்வேறு பிரச்சினைகள் பற்றி மக்கள் பிரதிநிதிகளின் வாயிலாக அறியக் கூடியதாகவும் உள்ளது. நல்லிணக்கம், சமாதானம், சர்வமத ஒன்றுபடல் என்பன இந்நாட்டில் ஏற்பட வேண்டும் என்பது எமது எதிர்பார்ப்பாக இருக்கிறது.
தமிழ்த் தேசியக் கூட்டமைப்பு வடகிழக்கு இணைய வேண்டுமென கோருகின்றது. அதற்கான நியாயங்களைக் கூறிவரும் சூழ்நிலையில் யுத்தகால சூழ்நிலைக்குப் பின் வடகிழக்கில் மீள் கட்டு மானம், மீள்குடியேற்றம் தொடர்பில் அரசு எவ்வித முன்னெடுப்புக்களை மேற்கொண்டுவருகின்றது. இவ்விடயம் தொடர்பில் பொறுப்புகூறும் முகமாக இலங்கை அரசுக்கு நாம் அழுத்தம் கொடுப்பதுடன் உதவிபுரியும் நோக்குடனேயே எமது இன்றைய விஜயம் அமைந்துள்ளது.
எமது பயணத்தில் கிளிநொச்சி, திருகோணமலை குறிப்பாக சம்பூர் நிலைமைகளை தீர்க்கமாக அவதானித்து வந்துள்ளோம். வட அயர்லாந்து, கம்போடியா, பெரு ஆகிய மூன்று நாடுகளிலும் ஏற்பட்ட நல்லிணக்கம், சமாதானம் ஆகியவற்றை உதாரணங்களாகக் கொண்டு இலங்கையிலும் நல்லிணக்கத்தையும் சமாதானத்தையும் உண்டாக்க ஆதரவு கொடுப்பதுடன் அழுத்தம் தரவும் நாம் முயன்று வருகின்றோம்.
குறிப்பாக, இங்கிலாந்தின் அங்கிலிக்கன் திருச்சபையின் பேராயர் தனது பதவிக் காலத்தில் தூரநோக்கின் அடிப்படையில் உலகில் நல்லிணக்கத்தையும் சமாதானத்தையும் கொண்டுவர வேண்டுமென்று நினைப்பது போல், சமாதானத்தை கொண்டு வர முன்னெடுக்கும் நாடுகளில் இலங்கையிலும் அத்தகையதொரு சமாதானத்தைக் கொண்டுவரவேண்டுமென பேராயர் விருப்பம் கொண்டுள்ளார்.
எனவே அவரையும் சந்தித்து இலங்கையில் சமாதானத்தை கொண்டுவரும் முயற்சி பற்றி ஆலோசனை பெற்று இலங்கையில் கூடியவிரைவில் நல்லிணக்க செயற்பாடுகளை கொண்டுவர அழுத்தமும் ஆதரவும் வழங்க முயற்சிகளை மேற்கொள்வோமென பிரித்தானியத் தூதுவர் குறிப்பிட்டதுடன் சிவில் அமைப்புக்களின் கோரிக்கைகளையும் கருத்துக்களையும் கவனமாக செவிமடுத்தார்.
சிவில் அமைப்பைச் சார்ந்த ஸ்ரீஞானேஸ்வரன் தூதுவருக்கு அன்றாட பிரச்சினைகள் பற்றி விளக்கிக் கூறுகையில், சம்பூர் மீள்குடியேற்றம் செய்யப்பட்டபோதும் அம்மக்களின் அடிப்படைப் பிரச்சினைகளைத் தீர்த்து வைப்பதில் அரசு மந்தகதியில் செயற்பட்டு வருகின்றது.
நல்லிணக்கத்துக்கான சூழ்நிலையொன்று உருவாகியிருக்கும் நிலையில் அதற்கான குரலை புதிய அரசாங்கம் எழுப்ப முடியும். முப்படைகளின் கைவசமுள்ள தனியாருக்கும் மற்றும் பொது அமைப்புக்கள், மத ஸ்தாபனங்களுக்கு சொந்தமான ஏராளமான காணிகள் இன்னும் விடுவிக்கப்படவில்லை.
வடகிழக்கிலுள்ள காவல்துறையைப் பொறுத்தவரை தமிழ் மக்களுக்கு தொடர்ந்தும் பிரச்சினையாகவே இருந்து கொண்டிருக்கிறது. சிங்களக் குடியேற்றங்கள் என்பது கட்டுக்கடங்காத வகையில் எல்லை மீறி மேற்கொள்ளப்படுகிறது. தொடர்ந்தும் புலனாய்வுப் பிரிவினரின் அட்டூழியங்கள் இடம்பெற்றுவருவதுடன் தமிழ் மக்கள் அச்சுறுத்தலுக்கு ஆளாக்கப்பட்டு வருகின்றார்கள்.
வடகிழக்கில் தொடர்ந்தும் பொருளாதார அச்சுறுத்தல்களுக்கு தமிழ் மக்கள் ஆளாகி வருகின்றார்கள் என்பதற்கு உதாரணந்தான் குச்சவெளி மீனவர் பிரச்சினைகளும் காணி அபகரிப்புக்களுமாகும்.
போருக்குப்பின்னுள்ள நிலைகளில் பாரிய பிரச்சினையாக மாறியிருப்பது வேலையில்லாப் பிரச்சினையாகும். திட்டமிட்ட முறையில் தமிழ் யுவதிகளும் இளைஞர்களும் புறக்கணிக்கப்படுவதுடன் வேறுபாடு காட்டப்படுகிறது.
இன்னுமொரு பாரிய பிரச்சினையாகக் காணப்படுவது புனர்வாழ்வு பெற்ற போராளிகளின் வாழ்வாதாரப் பிரச்சினையாகும் என்று பல்வேறு விடயங்கள் பற்றி தூதுவரி டம் சிவில் அமைப்பினர் எடுத்துக் கூறினர்.
No comments:
Post a Comment