வவுனியாவில் பொலிசார் மதுபோதையில் ஓடிய வாகனம் ஆட்டோவை மோதித்தள்ளியதில் இருவர் படுகாயம்!

வவுனியாவில் பொலிசார் இருவர் மதுபோதையில் ஓடிவந்த கப் ரக வாகனம் ஆட்டோ ஒன்றை மோதித் தள்ளியதில் ஆட்டோவில் பயணம் செய்த இருவர் காயமடைந்து வவுனியா வைத்தியசாலையில் அனுமதிக்கப்பட்டுள்ளனர்.

 

இது தொடர்பாக மேலும் தெரியவருவதாவது,

நேற்று மாலை 6 மணியளவில் வவுனியா மன்னார் வீதியில் பயணித்த ஆட்டோ ஒன்று ஏ9 வீதியில் ஏற முற்பட்ட போது அவ்விடத்தில் கடமையில் நின்ற பொலிசார் அதனைத் தடுத்து நிறுத்தினார். அதன் போது பின்னால் மது போதையில் வந்த அனுராதபுர பொலிசார் சிவில் உடையில் செலுத்தி வந்த கப் ரக வாகனம் வேகக் கட்டுப்பாட்டை இழந்து ஆட்டோவை மோதித்தள்ளியது. 

 

இதனால் ஆட்டோ வீதியின் மறுபக்கத்திற்கு உருட்டிச் செல்லப்பட்டு கடுமையாக சேதமடைந்தது. இவ் விப்தில் ஆட்டோ சாரதியும் அதில் பயணித்தவரும் காயமடைந்துள்ளதாக வவுனியா பொலிசார் தெரிவிhத்துள்ளனர்.

 

இதில், வவுனியா மாவட்ட செயலக அலுவலக உத்தியோகத்தரான வைரவநாதன் திலீபன் என்ற பூந்தோட்டத்தைச் சேர்ந்த மூன்று பிள்ளைகளின் தந்தை கடுமையாக காயமடைந்துள்ளதாக பொலிசார் தெரிவித்தனர்.