12 கட்சிகளுடன் ஜனாதிபதி மைத்திரிபால சிறிசேன புரிந்துணர்வு ஒப்பந்தத்தில் கைச்சாத்திட்டுள்ளார்.
ஐக்கிய மக்கள் சுதந்திரக் கூட்டமைப் பின் மத்திய செயற்குழுக் கூட்டம் நேற்று முன்தினம் ஜனாதிபதி மைத்திரிபால சிறி சேன தலைமையில் ஜனாதிபதியின் உத்தியோகபூர்வ இல்லத்தில் இடம்பெற்றிருந்தது.
இதன்போது ஐக்கிய மக்கள் சுதந்திரக் கூட்டமைப்பை மறுசீரமைப்பது குறித்து விரிவாகக் கலந்துரையாடப்பட்டிருந்தது. அதன் பிரகாரம் அனைத்து சுதந்திரக் கூட்டமைப்பில் அங்கம்
வகிக்கும் பங்காளிக்கட்சிகள் மற்றும் புதிதாக இணையவுள்ள கட்சிகள் ஆகியவற்றுடன் புதிய புரிந்துணர்வு ஒப்பந்தமொன்றை கைச்சாத்திடுவதெனத் தீர்மானிக்கப்பட்டிருந்தது. அத்துடன் ஐக்கிய மக்கள் கூட்டமைப்பில் அங்கம் வகித்துக் கொண்டிருக்கும் பெரும்பான்மை இனக் கட்சிகளுடனும் தொடர்ந்து பேச்சுவார்த்தை மேற்கொண்டு கூட்டமைப்பை விரிவாக்குவது தொடர்பாகவும் கவனம் செலுத்தப்பட்டிருந்தது.
அதன் தொடர்ச்சியாக ஜனாதிபதி மைத்திரிபால சிறிசேனவின் உத்தியோக பூர்வ இல்லத்தில் ஐக்கிய மக்கள் சுதந்திர கூட்டமைப்பில் அங்கம் வகிக்கும் பங்காளிக்கட்சிகளுடன் உத்தியோகபூர்வமான புரிந்துணர்வு உடன்படிக்கையைக் கைச்சாத்திடும் நிகழ்வு நேற்று சனிக்கிழமை காலை இடம்பெற்றிருந்தது.
ஜனாதிபதி மைத்திரிபால சிறிசேன தலைமையில் இந்நிகழ்வில் அமைச்சர்களான மஹிந்த அமரவீர, பைஸர் முஸ்தபா ஆகியோரும் ஈழ மக்கள் ஜனநாயகக் கட்சி செயலாளர் நாயகமும் யாழ்.மாவட்ட பாராளுமன்ற உறுப்பினருமான டக்ளஸ் தேவாந்தா, ஜனநாயக மக்கள் காங்கிரஸ் ஸ்தாபகத் தலைவர் பிரபாகணேசன், இலங்கை தொழிலாளர் காங்கிரஸ் தலைவரும் நுவரெலியா பாராளுமன்ற உறுப்பினருமான முத்து சிவலிங்கம், ஸ்ரீ ரெலோ தலைவர் உதயராசா, தேசிய காங்கிரஸ் தலைவர் அதாவுல்லா உட்பட ஏனைய கட்சிகளின் முக்கியஸ்தர்களும் பங்கேற்றிருந்தனர்.
இதன்போது ஐக்கிய மக்கள் சுதந்திரக் கூட்டமைப்பை வலுவானதாக விரிவாக்கும் நோக்கிலும் அடுத்து நடைபெறவுள்ள உள்ளூராட்சி தேர்தலை இலக்கு வைத்தும் குறித்த புரிந்துணர்வு உடன்படிக்கைகள் கைச்சாத்திடப்பட்டிருந்தன.
ஜனாதிபதி கருத்து
இந்த நாட்டில் கடந்த காலங்களில் கூட்டுக்களால் தான் ஆட்சி அமைக்கப்பட்டுள்ளதோடு ஆட்சி அகற்றப்பட்டிருப்பதையும் கண்டிருக்கின்றோம். எவ்வாறாயினும் தனிக்கட்சியொன்றினால் ஆட்சியமைப்பது என்பது தற்போதைய நிலையில் முடியாத காரியமாகும். ஆகவே சிறுபான்மை பெரும்பான்மை என்ற பேதமில்லாது நாம் அனைவரும் ஒன்றிணைந்து செயற்படவேண்டும்.
ஐக்கிய மக்கள் சுதந்திரக் கூட்டமைப்பை இலக்குகளை எட்டுவதற்காக மறுசீரமைக்க வேண்டும். பங்காளிக்கட்சிகளுடன் புதிய புரிந்துணர்வு உடன்படிக்கைகளை மேற்கொள்ளவேண்டியுள்ளன. அதன் ஒரு அங்கமாகவே தற்போது உடன்படிக்கைகள் கைச்சாத்திடப்பட்டுள்ளன.
எதிர்காலத்தில் ஐக்கிய மக்கள் சுதந்திரக் கூட்டமைப்பில் அங்கம் வகிக்கும் ஏனைய கட்சிகளையும் ஒன்றிணைக்கும் பேச்சுக்கள் தொடர்ந்தவண்ணமுள்ளன.
ஒரு குடும்பத்தில் பல பிள்ளைகள் காணப்படுவது இயல்பானது. ஒவ்வொருவரும் ஒவ்வொரு குணத்தைக் கொண்டிருக்கலாம். ஆனால் அவர்கள் அனைவரும் கேட்டவற்றை பெற்றுக்கொடுக்க முடியாது. அதற்காக அவர்களை புறக்கணிக்கவும் முடியாது. அனைவரும் ஒன்றிணைத்து ஒற்றுமையான பலம் மிக்க கட்டமைப்பாக ஐக்கிய மக்கள் சுதந்திரக் கூட்டமைப்பை எதிர்காலத்தில் உருவாக்குவதே எமது இலக்காகும் என ஜனாதிபதி மைத்திரிபால சிறிசேன உடன்படிக்கையில் கைச்சாத்திட்ட கட்சிப்பிரதிநிதிகள் மத்தியில் கருத்து வெளியிட்டிருந்தார்.
இதேவேளை, இந்நிகழ்வின்போது அடுத்த வருடத்தின் பெப்பரவரி மாதத்தில் உள்ளூராட்சித் தேர்தலை நடத்துவதற்கு திட்டமிடல்கள் இடம்பெற்றுவருவதாகவும் பெரும்பாலும் 70சதவீதம் வட்டார முறையிலும் 30சதவீதம் விகிதாசர முறையிலும் நடத்துவதையும் ஐக்கிய மக்கள் சுதந்திரக் கூட்டமைப்பு விரும்புவதாகவும் கலந்துரையாடப்பட்டுள்ளது.
மேலும் ஐக்கிய மக்கள் சுதந்திரக் கூட்டமைப்பில் அங்கம் வகிக்கும் தினேஷ் குணவர்தனவின் மாஜன கட்சி, விமல்வீரவன்ஸவின் தேசிய சுதந்திர முன்னணி, உதயகம்மன்விலவின் பிவித்துரு ஹெல உறுமய உட்பட கம்னியூஸ்ட் கட்சிகள் எவையும் குறித்த நிகழ்வில் பங்கேற்கவில்லை என்பது குறிப்பிடத்தக்கது.
No comments:
Post a Comment