எகிப்து விமான விபத்தில் உயிரிழந்த இரண்டாவது கனேடியர் அடையாளம் காணப்பட்டார் !

எகிப்திய விமான விபத்தில் உயிரிழந்த இரண்டாவது கனேடியர் அடையளம் காணப்பட்டுள்ளார். ரொறன்டோவைச் சேர்ந்த Medhat Tanious என்பவரே இவ்வாறு உயிரிழந்துள்ளார் என்று தெரிவிக்கப்படுகின்றது.

பிரான்ஸின் தலைநகர் பரிஸில் இருந்து எகிப்து தலைநகர் கெய்ரோ நோக்கி 66 பயணிகளுடன் பயணித்த எம்.எஸ் 804, கடந்த வியாழக்கிழமை மத்தியதரைக் கடல் பகுதியில் வீழ்ந்து விபத்துக்குள்ளானது. பின்னர் அதில் பயணம் செய்தவர்களை மீட்கும் பணிகள் தொடர்ந்து இடம்பெற்று வந்தன.

குறித்த விபத்தின்போது, தமது நாட்டவர்கள் இருவர் அவ்விமானத்தில் பயணம் செய்ததாக கனேடிய வெளிவிவகார அமைச்சர் ஸ்டீபன் டியோன் தெரிவித்திருந்தார். இந்நிலையில் அண்மையில் அதில் ஒரு கனேடியர் அடையாளம் காணப்பட்டார்.

இந்நிலையிலேயே தற்பொழுது இரண்டாவது கனேடியரும் அடையாளம் காணப்பட்டுள்ளார். உயிரிழந்த Medhat Tanious தனது உறவினர் என்றும், எகிப்து கடவுச்சீட்டின் மூலம் அவர் அங்கு பயணம் செய்யும்போதே இந்த விபத்து ஏற்பட்டுள்ளதாகவும் அவுஸ்திரேலியாவில் வசித்து வரும் Viola Nasserallah என்பவர் தெரிவித்துள்ளார்.