அமெரிக்காவில் நடைபெறும் விசேட தேவையுடையவர்களுக்கான ஒலிம்பிக் போட்டியில் யாழ் மாணவர்கள்!

அமெரிக்காவின் புளோரிடா மாகாணத்தில் இடம்பெறும் விசேட தேவையுடைய மாணவருக்கான ஒலிம்பிக் போட்டியில் யாழ்ப்பாணம் கோண்டாவில் சிவபூமி மனவிருத்திப் பாடசாலையில் பயிலும் மாணவர்கள் மூன்று போர் கலந்து கொள்ளவுள்ளனர். 

யாழ்ப்பாணத்தில் விசேட தேவையுடையவர்களுக்கான பாடசாலையான சிவபூமி சிறுவர் மனவிருத்திப் பாடசாலை சர்வதேச விசேட தேவையுடைய மாணவர்களின் ஒலிம்பிக் போட்டியில் மூன்றாவது தடவையாகவும் தமது மாணவர்களை பங்குபெற்றச் செய்திருப்பது குறிப்பிடத்தக்கது.

இம் மாணவர்களுக்கான போக்குவரத்துச் செலவில் ஒரு மாணவனது செலவை யாழ்ப்பாணம் இந்துக் கல்லுாரி பழைய மாணவர்கள் பொறுப்பேற்றுள்ளனர்.

குறித்த மூன்று மாணவர்களும் தேசிய ரீதியல் நடாத்தப்பட்ட போட்டிகளில் சிறப்பான திறமைகளை வெளிப்படுத்தியதன் மூலமே விசேட தேவையுடைய மாணவருக்கான ஒலிம்பிக் போட்டியில் தெரிவாகியுள்ளனர்.

இவர்களுக்கான பயிற்சிகள் மாத்தறை சர்வதேச விளையாட்டரங்கிலும் யாழ் பல்கலைக்கழக மைதானத்திலும் வழங்கப்பட்டு வருகின்றன. அங்கு இவர்கள் தீவிர பயிற்சிகளை மேற்கொண்டு வருகின்றனர்.