நல்லாட்சி என்று கூறிக்கொள்ளும் அரசாங்கமும் இதனைத் தடுத்து நிறுத்தவில்லை. இதற்கு இந்துக்களின் சார்பில் இந்துமாமன்றம் தனது கண்டனத்தை தெரிவித்துக்கொள்வதாக தெரிவித்துள்ளது.
மன்றம் விடுத்துள்ள செய்தியில் மேலும் கூறியுள்ளதாவது,
இலங்கையின் வடக்குக்கிழக்கு பிரதேசங்களில் தமிழர்கள் செறிந்து வாழும் இடங்களில் புத்தவிகாரைகள் அமைக்கப்பட்டுவருவதையும் இது தமிழ் இந்துக்களிடையே மிகவும் விசனத்தைத் தோற்றுவிப்பதாகவும் ஏற்கனவே அரசியல் தலைமைகளுக்குப் பல தடவைகள் அகில இலங்கை இந்து மாமன்றம் சுட்டிக்காட்டியுள்ளது.
அண்மையில் கூட வடமாகாணத்தில் பல்வேறு இடங்களிலும் அமைக்கப்பட்டுள்ள புத்தவிகாரைகளின் புகைப்படங்கள் உட்பட சகல விபரங்களையும் பிரதமர், மீள்குடியேற்ற அமைச்சர், எதிர்க்கட்சித் தலைவர் ஆகியோருக்கு பிரதிகளுடன் ஜனாதிபதிக்கும் முறையிட்டிருந்தோம்.
எனினும் எவ்வித சாதகமான நடவடிக்கையும் இதுவரை எடுக்கப்பட்டதாகத் தகவல்கள் இல்லை என்பது மிகவும் மனவேதனைக்குரியதாகும்.
இந்நிலையில் இரு தினங்களுக்கு முன்னர் வெகுஜன ஊடகங்கள் மூலமாக கேள்வியுற்ற செய்தியால் இந்து மக்களின் உச்ச நிறுவனமான அகில இலங்கை இந்து மாமன்றம் மிகவும் கவலைக்குள்ளாகியது.
கடந்த காலங்களில் பாதுகாப்பு வலயங்களாக இருந்து தற்போது விடுவிக்கப்பட்ட வலிவடக்கு பிரதேசத்தில் அமைந்திருந்த வீமன்காமம் பிள்ளையார் ஆலயம் உடைக்கப்பட்டு அழிக்கப்பட்டதுடன் அவ்விடத்தில் பௌத்தவிகாரையொன்று அமைக்கப்பட்டுள்ளது.
இது இந்துக்களின் மனநிலையை அவர்களது இறை நம்பிக்கையை எவ்வளவு தூரம் பாதிக்கும் என்பதை இராணுவத்தினர் உணரவில்லையாயினும் நல்லாட்சி அரசு எனக்கூறிக்கொள்ளும் அரசு கூட இதனைத் தடுப்பதற்கு எவ்வித அக்கறையும் கொள்ளவில்லையென்பதைக் கவலையுடன் சுட்டிக்காட்ட விரும்புகின்றோம்.
வலிவடக்கில் இன்னமும் இராணுவத் தேவைக்கென பாரியளவு நிலப்பரப்பு படையினர் வசம் உள்ளது. இதில் அமைந்திருந்த எத்தனை ஆலயங்களுக்கு இவ்வாறான நிலை தோன்றியுள்ளதோ தெரியவில்லை.
ஒவ்வொரு மனிதனுக்கும் தனது சமயத்தைச் சுதந்திரமாகக் கடைப்பிடிக்கும் உரிமை இலங்கையில் அரசமைப்புரீதியாக உறுதிப்படுத்தப்பட்டுள்ளதோடு ஒரு சமயத்தை வளர்க்கின்றோம் என்பதற்காக இன்னொரு சமயச் சின்னங்களை அழித்தொழிப்பதை எவ்வகையிலும் நியாயப்படுத்தவுமில்லை.
புத்தபிரான் அகிம்சையைப் போதித்து பௌத்த மதத்தை ஏற்பவர்கள் யாவரும் அகிம்சைவழியிலே செயல்பட வேண்டுமெனவும் கூறியுள்ளார்.
பௌத்த மதத்தைப் பின்பற்றுபவர்களெனக் கூறிக்கொள்ளும் இலங்கை இராணுவத்தினர் இவ்வாறான மனிதாபிமானமற்ற செயல்களில் ஈடுபடுவதை ஏற்றுக்கொள்ள முடியாததுடன் இந்துக்களால் ஜீரணிக்க முடியாததுமாகும்.
இவ்வாறான செயல்களை நல்லாட்சி அரசாங்கம் உடனடியாகத் தடுத்து நிறுத்துவதுடன், தொடர்ந்தும் தமிழ் பிரதேசங்களிலுள்ள இந்து ஆலயங்களுக்கு பாதுகாப்பை வழங்க வேண்டும் எனக் கேட்டுக்கொள்கின்றோம்.
முக்கியமாக இராணுவப் பிரதேசங்களிலுள்ள இந்து ஆலயங்கள் பாதுகாக்கப்படுவதுடன் அந்நிலப் பரப்பை மக்களிடம் மீளக் கையளிக்கும்போது சேதமடைந்த மத வணக்க ஸ்தலங்களை புனரமைப்புச் செய்து கையளிக்க வேண்டுமெனவும் உறுதியாகக் கேட்டுக்கொள்கின்றோம்.
No comments:
Post a Comment