அந்த தகவல்களில் எவ்வித உண்மை தன்மையும் இல்லை. அவர் கூறி வருவது போல மின்சார கதிரைகள் தொடர்பாக அவருக்கு அச்சுறுத்தல் இருந்திருந்தால் ஜனாதிபதி மைத்திரிபால சிறிசேன அந்த குற்றச்சாட்டில் சிக்கியிருப்பார் என திறன்கள் அபிவிருத்தி மற்றும் தொழிற்பயிற்சி இராஜாங்க அமைச்சர் பாலித ரங்கே பண்டார தெரிவித்தார்.
பாராளுமன்றத்தில் அமர்வுகளில் கலந்து கொண்டு தமக்கு உள்ள பிரச்சினைகள் தொடர்பாகவும், தமக்கு உள்ள அச்சுறுத்தல் தொடர்பாகவும் கூறாது வேறு இடங்களில் மஹிந்த பிரசாரங்களை பரப்பி வருவது வேடிக்கையாகவும் விமர்சனத்துக்கு உரியதாகவும் உள்ளது என்றும் அவர் மேலும் குறிப்பிட்டார்.
அரசாங்க தகவல் திணைக்களத்தில் நேற்று நடைபெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கையிலேயே அவர் இதனை தெரிவித்தார்.
அவர் மேலும் கூறுகையில்,
ஜனாதிபதி மஹிந்த ராஜபக் ஷ போர்க் குற்றங்கள் மற்றும் மின்சார கதிரை தொடர்பாக போலியான தகவல்களையும் பிரசாரங்களயும் மட்டுமே மேற்கொண்டு வருகின்றார்.
அந்த தகவல்களில் எவ்வித உண்மை தன்மையும் இல்லை. அவருக்கு அரசியல் தெரியாமல் இல்லை. பொய்ப் பிரசாரங்கள் மூலமும் பொய்யான தகவல்கள் மூலமும் மக்களை எவ்வாறு ஏமாற்றுவது என்பது அவருக்கு நன்றாகவே தெரிந்திருக்கிறது.
அதனாலேயே அவர் விகாரைகளிலும் வேறு சில இடங்களிலும் இவ்வாறான பிரசாரங்களை மேற்கொண்டு வருகின்றார்.
எல்லா இடங்களிலும் தாம் மக்களின் பிரதிநிதி மட்டுமே. ஒரு போதும் அரசாங்கத்தின் பிரதிநிதியல்ல என கூறி வருகின்றார். உண்மையில் மக்களின் பிரதிநிதி என்றால் பாராளுமன்ற அமர்வுகளில் கலந்து கொண்டு போர் குற்றங்கள் தொடர்பாகவும் மின்சார கதிரைகள் தொடர்பாகவும் தமக்கு இருக்கின்ற அசச்சுறுத்தல்கள் தொடர்பாகவும் விவாதிக்கலாம்.
அவ்வாறு அவர் விவாதிப்பாராக இருந்தால் அரசாங்கம் இது தொடர்பில் ஆராய்ந்து உரிய முடிவுகளை வெளியிடும். முன்னாள் ஜனாதிபதி ஒருவருக்கு பாதுகாப்பு வழங்க வேண்டிய மிக முக்கிய கடப்பாடு அரசாங்கத்துக்கு இருக்கிறது. அதனை விடுத்து விகாரைகளில் அரசாங்கத்தை விமர்சிப்பது வேடிக்கையாக உள்ளது.
தேர்தலுக்கு பிறகு அவர் பாராளுமன்றதுக்கு வருவதே கிடையாது. அவரை பிரதிநிதியாக தெரிவு செய்த மக்களின் நிலை என்னவென்பது கூட அவருக்கு தற்போதைய சூழ்நிலையில் தெரிந்திருக்க வாய்ப்பில்லை.
பொய் பிரசாரங்கள் மூலம் மக்களின் வாக்குகளை மீண்டும் மஹிந்த கைப்பற்றி ஆட்சியை பிடிக்கவே இவ்வாறு பிரசாரங்களை மேற்கொண்டு கொண்டு வருகின்றார்.
மஹிந்தவை தலைவராக கொண்டு செயற்பட்டு வரும் எதிரணியும் அவ்வாறே உள்ளது. அந்த குழுவுக்கு மஹிந்த இல்லாமல் அரசியல் செய்ய முடியாது.
கடந்த அரசாங்கத்தில் அவர்கள் செய்த குற்றங்களை மறைப்பதற்காகவே அவர்கள் அரசாங்கத்தை நேரடியாக விமர்சித்து வருகின்றனர். இது தொடர்பாக மக்கள் தகுந்த நேரத்தில் தீர்க்கமான முடிவுகளை எடுப்பார்கள்.
வற் வரி தேசியஅரசாங்கம் வற் வரியை நூற்றுக்கு 15 விகிதமாக அதிகரித்து மக்களின் சுமைகளை மேலும் கூட்டுகிறது என்று பலர் விமர்சித்து வருகின்றனர்.
அவர்கள் ஒரு உண்மையை விளங்கிக் கொள்ள வேண்டும். மைத்திரி–ரணில் இணைந்த தேசிய அரசாங்கம் ஒருபோதும் மக்களின் மீது சுமைகளை ஏற்றி வைக்கவில்லை. நாட்டு நலனே அரசாங்கத்துக்கு முக்கியம்.
அதனை முக்கிய குறிக்கோளாக கொண்டு அரசாங்கம் செயற்பட்டு வருகின்றது. இதனை அரசாங்கத்தை விமர்சிக்கின்றவர்கள் நன்கு விளங்கி கொள்ள வேண்டும்.
அத்தியாவசிய பொருட்களின் விலைகள் ஒரு போதும் அதிகரிக்கப்பட வில்லை. பற்பசைக்கும் பற் தூரிகைக்கும் மட்டுமே வற் வரி அறவிடப்பட்டுள்ளது.
அதற்கு மாறாக அத்தியாவசிய பொருட்களான சீனி , பருப்பு ,நெத்திலி போன்ற பொருட்களுக்கு வற் வரி அறவிடப்படவில்லை. கூட்டு எதிர்க்கட்சியின் தூண்டுதலினால் நாடு முழுவதும் கடையடைப்பு செயற்பாடுகளை வியாபாரிகள் மேற்கொண்டு வருகின்றனர்.
இந்த கடையடைப்பு செயற்பாடுகளினால் ஒருபோதும் வியாபாரிகள் பாதிப்படைய வில்லை. கடந்த அரசாங்கம் சர்வதேசத்திடம் இருந்து பெற்ற கடனை அடைக்கவே தேசிய அரசாங்கம் வற் வரியை அதிகரித்திருக்கிறது என்பதன் காரணத்தை மக்கள் நன்கு அறிவார்கள்.
எனினும் கூடிய விரைவில் ஜனாதிபதி பிரதமரின் தலையீட்டினால் வற் வரி குறைக்கப்படும்.
பஸ் கட்டணங்கள் அதிகரிப்பு. பஸ் கட்டணங்கள் அதிகரிப்பு தொடர்பாக ஜனாதிபதி மற்றும் பிரதமர் ஆகியோர் தனியார் பஸ் உரிமையாளர்கள் சங்கத்துடன் இறுதிக் கட்ட பேச்சுவார்த்தைகளை நடத்திவருகின்றனர்.
பல்வேறு கோரிக்கைகளை முன்வைத்து குறித்த சங்கத்தினர் ஆர்ப்பாட்டங்களில் ஈடுபட போவதாகவும் ஒரு தகவல் கசிந்திருந்தது.
எனவே இந்த விடயம் ஜனாதிபதி மற்றும் பிரதமரின் நேரடி தலையீட்டில் இருக்கின்ற காரணத்தினால் எதிர்வரும் திங்கட்கிழமை அளவில் தீர்க்கமான முடிவு ஒன்று எட்டப்படும் என்றார்.
No comments:
Post a Comment