கிளிநொச்சி ஏ9 வீதியின் 1.5 கிலோ மீற்றர் தூரத்தில் உள்ள பொன்னகர் முதலாம் கட்டைப்பகுதியில் உள்ள மக்கள் தமக்கான குடிநீர் உள்ளிட்ட அடிப்படை வசதிகளைப் பெறுவதில் தினமும் பெரும் நெருக்கடிகளை எதிர்கொள்வதாக தெரிவித்துள்ளனர்.
கிளிநொச்சி மாவட்டத்தின் கரைச்சிப்பிரதேச செயலர் பிரிவின் கீழ் உள்ள பொன்னகர் முதலாம் கட்டைப் பகுதியில் 260 இற்கும் மேற்பட்ட குடும்பங்கள் வாழ்ந்து வருகின்றன. இவர்கள் தமக்கான அன்றாடத்தேவைக்குரிய குடிநீரைப் பெற்றுக் கொள்வதில் பெரும் சிரமங்களை எதிர்கொண்டு வருகின்றனர்.
தற்போது நிலவி வரும் வரட்சி காரணமாக கிணறுகளில் நீர் வற்றிக் காணப்படுவதனால் ஓரிரு கிணறுகளிலேயே தண்ணீரைப் பெற வேண்டிய நிலையுள்ளது. ஆனாலும் அவற்றிலும் நீர் வற்றி காணப்படுகின்றது.
இதேவேளை குடிநீர் தவிர்ந்த ஏனைய தேவைக்குரிய நீரைப் பெற்றுக்கொள்வதற்கு நீண்டதூரம் செல்ல வேண்டியிருப்பதாகவும் மற்றும் மின்சார வசதி, போக்குவரத்து என்பன காணப்படாமையால் தாம் பெரும் சிரமங்களை எதிர்கொள்வதாக அப்பகுதி மக்கள் தெரிவித்துள்ளனர்.
No comments:
Post a Comment