போரின் வடுக்களினால் இன்றுவரை உடல், உள ரீதியில் பாதிப்படைந்த தமிழ் பெண்கள் அவற்றிலிருந்து மீண்டெழ வேண்டும் என தமிழ்த் தேசிய மக்கள் முன்னணி வேட்பாளர் திருமதி பத்மினி சிதம்பரநாதன் தெரிவித்துள்ளார்.
பெண்கள் பண்பாட்டு மையத்தின் ஒழுங்கமைப்பில் போரால் பாதிக்கப்பட்ட பெண்களுக்கான ஆற்றுப்படுத்தல் அரங்கு கடந்த வியாழக்கிழமை கோப்பாய் முத்துச் சிற்பி அரங்க கூடத்தில் தமிழ்த் தேசிய மக்கள் முன்னணி வேட்பாளர் திருமதி பத்மினி சிதம்பரநாதன் தலைமையில் நடைபெற்றது.இந்த ஆற்றுப்படுத்தல் அரங்கில் போரால் பாதிக்கப்பட்டு கணவனை இழந்த, பெண் தலைமைத்துவ குடும்பங்களைச் சேர்ந்த பல பெண்கள் பங்கு பற்றி இருந்தார்கள். இதன்போதே அவர் மேற்கண்டவாறு தெரிவித்தார்.
இது தொடர்பில் அவர் அங்கு மேலும் தெரிவிக்கையில்,அரங்கச் செயற்பாடுகளின் ஊடாக ஆற்றுப்படுத்தல் என்பது பெண்களின் துன்ப துயரங்களையும், மனத் தடைகளையும் விடுவித்து அவர்களை சிந்தனைக்கும், புதிய செயற்பாடுகளுக்கும் ஊக்குவிக்கும்.ஒவ்வொரு பெண்களும் மற்றவர்களுடன் கலந்து பேசி உறவாடி தம் தடைகளை வென்று புதிய மனங்களுக்குட்படும் போது அவர்களால் தம் எதிர்காலம் பற்றிய நம்பிக்கையும் கடந்த கால அவலங்களை மீட்டிப் பார்த்து தெளிவடையவும் முடியும்.கடந்த காலப் போரின் தாக்கத்தால் பெண்கள் கணவனை இழந்தும், அங்கவீனமாயும் பெண் தலைமைத்துவக் குடும்பங்களாகவும் என்று பாதிப்புக்களை சுமந்து வருகின்றனர்.
இவ்வாறு சொத்துக்களையும் உயிர்களையும் இழந்து நாளாந்தம் நெருக்கடிக்கு உள்ளாகி வரும் எம் பெண்களுக்கான ஆற்றுப்படுத்தல் அரங்க செயற்பாடு இன்றைய தேவைகளுள் அடிப்படையான தேவையாக உள்ளது.2009 இன் பின் உடனடியாக செய்ய வேண்டிய இக்காரியத்தை யாருமே செய்ய வில்லை ஆற்றுப்படுத்தல் ஊடாக பெண்களை ஆளுமையும் சக்தியும் உள்ளவர்களாக மாற்ற முடியும் என்பதில் எமக்கு நம்பிக்கை உண்டு. நாம் அவ்வாறான பல செயற்றிட்டங்களை எங்கள் பெண்களுக்காக உருவாக்கி வெற்றியும் அடைந்துள்ளோம் என்றார்.
No comments:
Post a Comment